غريق واحد

اليوم عيد..انهاردة عيدنا..وناس كتير بتعيد..ناس كتير رايحة معانا..ناس احلامها زيينا ومشيين فى الطريق قبلنا ..هنروح والبحر يلمنا كلنا ومش هيختلف فى منظرنا كتير ولا فكرنا..كلنا عايزين نعيد كلنا زى بعضنا..

الصبح فطرنا ووقت الغدا كلنا اكلنا واتلمبنا على الايس كريم و شربنا الشاى و لما جة الجو برد كلنا اترعشنا ولما الموجة عليت علينا كلنا رجعنا بكرسينا ورا ..صحيح توقيتنا مش واحد لكن كلنا كنا واحد..

حتى فى همومنا اتجمعنا اترسم على وشنا هم شيلينوا وبنحاول ننساة كلنا استخبت تحت ضحكتنا شبح الحزن واقف مكانة ..لبسنا رغم اختلافة عكس مجتمعنا وافكارنا ..واتجمعت ملامحنا ورسمت صورة البلد رسمت صورة مكانا..

ولما غابت الشمس علينا ولقينا البحر بينادينا..نزلنا واتلمينا وموجة شالتنا وموجة تودينا وضحكة هنا وصرخة هناك وكورة عالية هنا و زرقا هناك..

وفى اللحظة الى كان الكل حواليا وكنا 100 ومكنتش واحد..لقيتنى بنزل والناس كلها فى بحر واحد ..والهوا بعد عنى و ظلمت مع اننا الصبح ..وسكتوا الناس و كانى عملت التلفزيون صامت و انادى وصوتى مبيطلعش واعفر وامد ايدى و الوج ينزلنى تحت ..رايح على فين يا جسمى بس ما الناس هنا وكلنا مع بعض..ونزلت اكتر وتعبت واتكتم نفسى وزهقت ونفختنى الماية ورجعت طلعت ..وتلم عليا الناس فى ايد راجل واحد وساعدونى و شالونى وكلهم على قلب واحد وصرخة وقول الشهادة بصوت واحد ولما سال واحد من بعيد قالولوا غريق واحد .....

سلام يا دنيا مش باق فيها غير اله واحد

احلم معاك !!!!!!

احلم معاك وانك جنبى ...احلم انك سندى ورافع رايتى..احلم انى ملكتك واتملكتك؟؟

احلم ببيت وفستان ابيض وطرحة..احلم بعيلة وضحكة وفرحة..احلم بانك هنا معايا

احلم بدرب واحد وايدك فى ايدى..احلم بحلم واحد ويربطنا امل واحد..احلم انك ملاكى

احلم بيك بتضمنى..احلم بضحكتى فى عينك وسعادتى بين ايدك..احلم ويحلالى

احلم بكلمة حنينة بصوت يداوى جراح الزمن بايد تحاوطنى من كل جانب وتمنع كل اذية ليا

احلم بليالى جميلة ساحرة بقلب يصون وعين تحفظ حبنا..اشوف نفسى فى عيونك ويبقى دة فى الحقيقة مكانى..

احلم بحنية تدوب الصخر وروح سامية ترفع من معنوياتى ..تحلم بلمسة تدوبنى وحبيب دايما يحمينى..

احلم باسرة كبيرة وعيلة مفهومها التفاهم وخناقة كل فين وفين تفكرنا وترجعنا للحنين..وايام زمااااااااان

احلم بجلسة تضمنا وهدوء حوالينا وسكينة عجيبة وسلام داخلى وامان وايدك فى ايدى..

احلم انك تسرح فيا و بكلامك تتعزل وتضخم فى جمالى..وتشوفنى عظيمة وجميلة عشان بتيصلى بعيونك..

احلم كمان ولا اعيش الواقع واتعامل مع حقيقة انى عمرى مجربت انى اتحب واواجة صعوبة انى عايشة ومعاك